ILOILO – Ginkansela ang tanan nga byahe sang sakayang pandagat magluwas lamang sang byahe sang motorbanca via Guimaras-Iloilo and vice versa.
Sa exclusive interview sang Bombo Radyo kay Commander Edison Diaz, sang Philippine Coast Guard-Iloilo, iya ginpahayag nga as of 3:00pm subong nga adlaw, kanselado ang tanan nga byahe sang Roll-on/roll-off (RoRo) vessel kag mga fastcraft nga nagabyahe sa Bacolod-Iloilo kag Dumangas-Iloilo and vice versa.
Samtang ang byahe naman sang mga motorbanca via Guimaras-Iloilo and vice versa, ang tubtob lang las 6:00 kaina sang kasisidmon.
Suno kay Diaz, mahibaluan pa bwas sa aga, kun kanselahon nagid ang tanan nga byahe sa mga sakayang pandagat.
Apang apisar sini, ginpahayag niya nga nakastandby na ang response team sang PCG sa mga baybayon.
Ginmanduan man ang tanan nga mga motorbanca kag magagmay nga sakayang pandagat nga indi na maglayag agud malikawan ang disgrasya.
