Padayon ang byahe sang tanan nga fiberglass motorbanca kag Roll-on/roll-off (RORO) vessel nga may ruta Iloilo City-Guimaras and vice versa sa Holy Week.
Sa interview sang Bombo Radyo kay Lt. Junior Grade Bryan Ignacio, Station Commander sang Philippine Coast Guard- Guimaras, iya ginpahayag nga wala sila naga-untat sang monitoring sang safety sang mga byahero padulong kag pagwa sa isla sang Guimaras apisar Semana Santa.
Ang byahe sang fiberglass motorbanca ang naga-umpisa las 6:00 sang aga tubtub las 8:00 sa gab-i.
Samtang ang byahe naman sang RORO vessel ang naga-umpisa las 6:00 sang aga tubtub las 7:00 sang gabi.
Pahayag ni Ignacio, subong nga Semana Santa, padayon nila nga ginapahanumdoman ang tanan nga vessel operators nga giyahan ang mga pasahero sa pagtuman sang minimum health protocol.
Nagakadapat man suno sa natungdan nga tsikyaron ang makina agud indi maabriya sa tunga sang lawod kag kompleto ang life jacket.
Ginpasalig man sang natungdan nga nakahanda ang ila aluminum boat kag padayon sila nga nagpatrolya sa Guimaras agud mamonitor ang safety sang tanan kag mga turista.
Nagpangabay man si Ignacio sa tanan nga magapadulong sa Guimaras nga bantayan sang maayo ang mga kabataan kag magdala sang kaugalingon nga trash bag ukon basurahan agud mapabilin nga malimpyo ang lugar nga halinan.
