Gina-imbestigaran sang Philippine Air Force (PAF) ang insidente sang pagsadsad sang isa sini ka C-295 transport aircraft sa runway matapos nakakas ang nose landing gear sang naghugpa sa Basco Airport sa Batanes province sang Biyernes sang hapon.
“On or about 3 p.m., Nov. 1, 2024, a C-295 aircraft of the PAF on an HADR (humanitarian assistance disaster relief) mission carrying essential relief supplies encountered an incident while landing in Basco Airport, Basco, Batanes,” suno kay PAF spokesperson Col. Ma. Consuelo Castillo.
Ini nga medium tactical transport aircraft ang nagakarga sang relief goods nga para sa mga biktima sang bagyo sa Batanes.
Suno sa Civil Aviation Authority of the Philippines (CAAP) sa Basco, siraduhon anay ang airport sa fixed-wing aircrafts tubtub buwas, Nobyembre 3, samtang nga nagapadayon pa ang imbestigasyon sa natabo.
Ginkumpirma naman sang Provincial Disaster Risk Reduction and Management Office nga safe ang tanan nga crew kag pasahero kasunod sang insidente.
Matandaan nga sang naglaslas si Bagyo Leon, ginpaidalom ang Batanes sa Tropical Cyclone Wind Signal No. 5 kag ginatos man ka mga pamilya ang nagbakwit.
Antes ang insidente sa airport, yara pa lamang sa pito ka oras ang pagbalik sa normal nga operasyon sa paluparan suno sa aviation authorities.#
