𝗠𝗔𝗡𝗜𝗟𝗔 — Nagpaguwa sang freeze order ang Court of Appeals (CA) batuk sa mga bank accounts kag propedad ni Kingdom of Jesus Christ (KOJC) founder nga si Apollo Quiboloy kag iban pa.
Sa isa ka 48-pahina nga resolusyon, ang appellate court nagpaguwa sang mando sa pag-freeze batok sa 10 bank accounts, pito ka real properties, lima ka motorsiklo, kag isa ka eroplano sang pastor.
Ang mando naglakip man sang mga bank account sang Kingdom of Jesus Christ kag sang Swara Sug Media Corporation, nga naga-operate sang Sonshine Media Network International (SMNI).
Nahibaluan nga ang Sonshine Media Network International amo ang media arm sang Kingdom of Jesus Christ.
Nagsiling man ang korte nga nakakita sila sang makatarunganon nga rason sa pagpati nga ang mga bank account ni Quiboloy ang may kaangtanan sa unlawful activities and predicate crimes pareho sang qualified human trafficking, sexual and child abuse, sex trafficking of children, fraud, conspiracy, marriage fraud, smuggling, and money laundering, kag iban pa.
Ginpahayag man sang Court of Appeals nga mangin epektibo gilayon ang freeze order kag magalawig sang 20 ka adlaw.
Nagpamalibad naman nga maghatag sang komento si Atty. Israelito Torreon, ang abogado sang Quiboloy kag KOJC, sa diin wala pa sila sang nabaton nga opisyal nga kopya sang mandu.
Samtang, nagpahayag naman si Atty. Mark Tolentino, abogado sang Sonshine Media Network International nga ginarespeto nila ang desisyon sang korte.
Si Quiboloy ang nagapangatubang sang kaso sa idalum sang Section 5(b) sang Republic Act 7610 ukon Special Protection of Children Against Abuse, Exploitation, and Discrimination Act kag sa idalum sang Section 10(a) sang amo man nga Act sa atubang sang Quezon City court.
Nagapangatubang man ini sang non-bailable Qualified Human Trafficking case sa idalom sang Section 4(a) sang Republic Act No. 9208, nga gin-amyendahan sa atubang sang korte sang Pasig.
Pareho nga nagpagwa sang arrest warrant ang duha ka korte batuk kay Quiboloy.
Ginatanyag man ang P10 million nga padya para sa mga impormasyon nga magadul-ong sa iya pagkadakop.
