Nakulangan si Iloilo City Councilor Sedfrey Cabaluna sa ginsaysay nga incident report sang Medicus Medical Center nahanungod sa pagka-aksidente sang rider nga si Orlando Homena sa tubang mismo sang nasambit nga ospital.
Ini ang ginpahayag sang konsehal sa una nga adlaw sang fact-finding investigation nga ginpatigayon kahapon, Setyembre 22, matapos ginpangayo ni Councilor Alan Zaldivar ang incident report kag clarification halin sa Medicus.
Suno kay Cabaluna, mas nagdamo pa ang mga excuses sa baylo nga klaruhon ang sitwasyon, ilabi na nga may ara sang topiko nga malayo na sa gindiskusyonan.
Lakip sa iya tani nga ginpangita ang mas klaro nga protocol sa pagresponde sa mga emergency nga nagakatabo sa gwa sang hospital premises, antes makasulod ang pasyente sa Emergency Room.
Ginpunto man niya ang pre-hospital care, referral system kag ang responsibilidad sang mga ospital kung may emergency nga nagakatabo sa ila vicinity.
Palamangkutanon man sa iya kung sin-o ang dapat tawgan, kung pwede bala makapagwa ang ospital sang stretcher ukon ambulance personnel, kag ano ang dapat nga response sa tion nga may naga-request sang bulig.
Suno pa sa iya, may ospital nga nagpahayag nga may ara na sila sang sistema para sa amo sini nga sitwasyon kag bukas nga ipakigbahin sa iban nga ospital.
Apang, may mga apprehension man parte sa jurisdiction, responsibilidad kag liability sang hospital personnel kung ang insidente nagakatabo sa gwa sang ospital.
Para kay Cabaluna, kinahanglan gid nga ma-review kag balikan sang mga ospital ang ila tagsa-tagsa ka protocols kag magpangita sang common ground agud masiguro nga indi ma-delay ang pagresponde sa mga emerhensya.
Kaangay man ini sa referral system nga suno sa diskusyon, may mga tion nga nagalawig sang pila ka minutos ukon oras antes makompleto ang referral sang pasyente.
Samtang, tuyo kuntani ipakita ni Cabaluna ang video sang insidente m bilang kabahin sang fact-finding investigation, apang nag-object ang ospital.
Sa pihak sini, gin-emphasize niya nga ang una nga katuyuan sang imbestigasyon amo ang paghibalo kung ano ang dapat palig-unon sa emergency response agod malikawan nga maliwat ang kaangay nga sitwasyon kag mas maprotektahan ang kabuhi sang mga pasyente.
TEXT BY: Bombo Cyrene Nasis
