Nasapwan nga wala na sang kabuhi si anay Department of Public Works and Highways (DPWH) Undersecretary Catalina Cabral sa idalom sang bahin sang Kennon Road sa Tuba, Benguet.
Ginkumpirmar ini sang kapulisan sa Benguet matapos ang insidente sang Disyembre 18.
Base sa inisyal nga imbestigasyon ang mga otoridad, padulong si Cabral sa La Union apang pag-abot sa Maramal, Camp 5, Camp 4 nagpabilin ini pasado ‘las tres sang hapon, kahapon.
Ginbalikan ini sang driver pasado ‘las-5 sang hapon kag wala na niya makita ang anay DPWH official.
Dugang pa sa imbestigasyon, pag-abot sang ‘las-7 sang gab-i nagpabulig na ang driver sini sa kapulisan kag didto Nakita nga wala na sang kabuhi si Cabral sa idalom sang 30 metro nga pil-as.
Matandaan nga nalakip si Cabral sa ginrekomendar sang Independent Commission for Infrastructure (ICI) nga makasuhan bangud sa pagkaulamid sini sa anomalya sa mga flood control.
Bangud diri, ginmanduan sang Office of the Ombudsman ang Benguet Police nga taguon ang mga gadget kaangay sang cellphone ni Cabral.
Sa subong, padayon ang ginapatigayon nga imbestigasyon sang mga otoridad sa natabo nga insidente.
