ILOILO CITY – Ginarespeto sang mga mga manugbaligya sa Cacho Property sa JM Basa St., Iloilo City ang desisyon sang Iloilo City Government nga indi pagpaboran ang ila hingyo nga temporaryo nga pagbalik sa sidewalks sa syudad subong nga yuletide season.
Sa interview sang Bombo Radyo kay Neil Dichupa, presidente sang Cacho Property Vendors, iya ginpahayag nga wala na sila sang mahimo kon amo ini ang pagsulundan sang gobyerno.
Antuson na lang sang manugbaligya suno kay Dichupa kun ini ang ginasiling sang city council.
Apang, pahayag sang natungdan, magapadayon sila sa pagpangabay bangud nagapati siya nga sa ‘dalayon nga pagpanuktok, may yara gid sang magabukas.’
Kaangot naman sa financial aid nga ihatag sang Department of Social Welfare and Development (DSWD), ginpahayag sang natungdan nga santu sa iya impormasyon, yara pa lang sa 70 ka mga miyembro sang ila asosasyon sa City Proper ang nahatagan sang bulig.
Madamo pa suno sa iya ang wala naka-avail ilabi na ang nagikan sa distrito sang La Paz kag Jaro.
Nahibaluan nga ginahingyo sang mga manugbaligya nga ginpahamtang sa Cacho Property kay Iloilo City Mayor Jerry Treñas nga kun mahimo, pahanugutan sila nga makabaligya sa higad sang dalan sing bisan 15 ka adlaw lang subong nga holiday season.
Ini agud mabawi nila ang ila tuman ka nubo nga income.
Apan, nahibaluan nga ini ang ginbalibaran sang Iloilo City Government bangud sa maathag nga paglapas sa mandu ni Presidente Rodrigo Duterte kaangot sa road clearing operations.
