MAASIN, ILOILO – Nagsungka na ang miyembro sang Citizen Armed Force Geographical Unit (CAFGU) nga suspek sa shooting incident sa Sitio Sambag, Brgy. Dagami, Maasin, Iloilo kun sa diin isa ang patay kag isa naman ang pilason.
Sa interview sang Bombo Radyo kay Police Major Fernand Limbungan, hepe sang Maasin Municipal Police Station, iya ginpahayag nga nagsungka ang suspek nga si Rene Maderable, legal ang edad, paagi sa bulig sang CAFGU detachment commander.
Suno kay Limbungan, apisar nga hinubog ang nagaguwa nga motibo sa krimen, ginpanindugan ni Maderable nga accidental firing ang natabo.
Ginpahayag ni Limbungan nga indi rehistrado nga armas luthang ang gingamit kag ipaidalom naman sa paraffin test ang suspek.
Sa subong, padayon ang imbestigasyon agud nga makatipon sang impormasyon may kaangtanan sa natabo nga krimen.
Nahibalu-an nga antes pa man ang insidnete, ginapahayag nga may yara sang pagbinaisay nga natabo sa tunga sang suspek kag sang mga biktima nga sanday Regiene Espiredion, 24 anyos sang Sitio Camansi, Brgy. Bolo kag Dexter John Cordero, 28 anyos sang Sitio Sambag, Brgy. Dagami sang nasambit nga banwa.
Pilas sa nawala nga bahin sang dughan ang ginkamatay ni Espiredion samtang pilas naman sa nawala nga tiil ang naangkon ni Cordero.
