CAFGU nga nagluthang patay sa iya detachment commander sa Tapaz Capiz, ginpasakaan na sang kaso nga murder

ILOILO CITY– Ginpasakaan na sang kaso ang myembro sang Citizen Armed Force Geographical Unit (CAFGU) nga nagluthang patay sa iya detachment commander sa Brgy. Daan Sur, Tapaz, Capiz.
Sa exclusive interview sang Bombo Radyo kay S/Insp Edwin Luces, hepe sang Tapaz Municipal Police Station, ginpahayag sini nga kaso nga murder ang ila ginpasaka sa suspek nga si CAFGU auxillary Bonnie Jimenez 39, residente sang Barangay Taganhin, Tapaz kag assigned sa Barangay Daan Sur Patrol base.
Suno kay Luces, maathag nga ginhungod kag ginplanuhan ni Jimenez ang pagpatay sa iya detachment commander nga si Staff Sgt. Ronilo Esoy, 40, sang Barangay Dayhagan Pilar, Capiz kag miyembro sang 12th IB ng 3ID Philippine Army.
Mismo ang tiayon sang biktima nga si Mrs. Dory Esoy, ang nagpasaka sang kaso sa CAFGU nga sa subong preso sa Tapaz Municipal Police Station.
Una na nga gin-ako sa Bombo Radyo sang suspek nga ginluthang sini ang iya detachment commander matapos nga ginsumbag ini sa dughan sang biktima bangud naakig ini sang nagleyensya siya nga idul-ong ang iya tiayon.