Natalana nga ipasarado ang Calajunan Sanitary Landfill sa Mandurriao, Iloilo City sa tion nga mahuman na ang ginapatindog nga Waste-to-Energy (WTE) Facility sa Barangay Ingore, La Paz.
Sa interview sang Bombo Radyo kay Engr. Neil Ravena, head sang GSO, iya ginpahayag nga ang pagpasirado sang landfill kabahin sang tikang sang Local Government sa pagpaayo sang sistema sang pagdumala sang basura sa syudad.
Suno kay Ravena, ang Waste-to-Energy facility may kapasidad nga magproseso sang 475 ka tonelada nga basura kada adlaw kag makagenerate sang 3.5 megawatts nga kuryente paagi sa paggamit sang anaerobic digestion technology.
Paagi sa sini nga teknolohiya, ang mga basura igaproseso kag himuon nga enerhiya nga mahimo gamiton sa pagproduce sang kuryente.
Ginpahayag man nga ang proyekto nagalapad sa masobra 33 ka ektariya nga duta sa Barangay Ingore kag ginapaabot nga mangin isa ka importante nga solusyon sa nagadugang nga volume sang basura sa syudad sang Iloilo.
Dugang pa ni Ravena, halos 40 ka tuig na nga ginagamit ang Calajunan landfill nga ginahabuyan sang basura sang syudad.
Bangud sini, ginakabig nga dako nga tikang ang pag-ilis halin sa traditionl landfill pakadto sa mas moderno kag mas environment-friendly nga sistema sang waste management.
