Ginpa-Bombo sang isa ka call center agent ang iya Team Leader matapos nga ginpa-duty pa ang upod nila sa trabaho nga naga-eksperyensya na sang sintomas sang COVID-19.
Sa interview sang Bombo Radyo kay alyas Mary, nagatrabaho sa isa ka Business process outsourcing (BPO) company sa distrito sang Mandurriao, Iloilo City, iya ginpahayag nga Hulyo 19 sang nag-ako ang iya upod sa trabaho nga halos duha ka semana na ini nga wala sang panabor.
Gilayon nga ginpalab- ot ini ni Mary sa ila nga Team Leader apang wala man lamang ini nag-abiso sa iya kaupdanan nga magpauli ukon magpaidalom sa self isolation kag sa baylo, ginapahayag nga ginpa-duty pa ang iya officemate.
Suno kay Mary, sila nalang ang nag-abiso nga magpaidalom sa swab test ang ila officemate sa diin naggwa nga positibo ini sa COVID-19.
Gin-ako sang natungdan nga nalatnan man siya sang virus sang nagpaidalom sa swab test.
Panawagan niya sa ila Team Leader nga kuntani indi na ini maliwat kag istriktuhan ang protocol sa tion nga may sintomas sang nasambit nga balatian ang pila ka empleyado.
Samtang, nagpasalig ang COVID-19 Team sang Iloilo City Government nga tsikyaron nila sa liwat ang BPO company kun may ginlapas gid man nga protocol.
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad, iya ginpahayag nga sa ila ginpatigayon nga contact tracing, may yara sang duha ka kumpirmado nga kaso sang virus nga residente sang Iloilo City sa amo nga BPO company nga nahamtang sa distrito sang Mandurriao, Iloilo City.
Suno kay Conlu, indi na ini una nga kahigayunan nga may nagreklamo sa amo nga BPO company rason nga ipalab-ot man nila ini sa management sang kompaniya.
