ILOILO CITY- Ginbawian gid sang kabuhi ang isa ka call center agent matapos nga nabungguan sang modernized jeepney sa Barangay Airport, Mandurriao, Iloilo City.
Ang biktima amo si Hermie Calaor, 55, residente sang Freedom Highway Street, Alimodian, Iloilo.
Sa interview sang Bombo Radyo kay Police Chief Master Sergeant Alexandro Agilles, traffic investigator sang Traffic Enforcement Unit, iya ginpahayag nga nagatabok sa pedestrian lane ang biktima pakadto sa iya trabaho sang nabungguan sang modernized jeepney nga ginamaneho ni Mark Babiera,residente sang Barangay San Antonio, San Miguel, Iloilo.
Suno kay Agilles, nagtabog ang biktima sang ginabanta lima ka metros ang kalayuon kag bangud sa impact, buka gid ang windshield sang modernized jeep nga ginapatihan nga madasig ang pagpadalagan.
Sa subong, yara na sa kustodiya sang Mandurriao Police Station ang driver.
Ginahulat naman ang mangin desisyon sang pamilya sang biktima kon magapasaka sila sang kaso batok sa driver.
