Sa labing-una nga tion sa sulod sang lima ka bulan, magabalik na sa pag-perform ang Filipino gymnastics superstar nga si Carlos Edriel Yulo samtang nga gina-preparahan man sini ang pagpasakop sa Paris Olympics subong nga tuig.
Kabahin si Yulo sa magapartisipar sa 2024 International Gymnastics Federation (FIG) Artistic Gymnastics World Cup Series sa Baku, Azerbaijan nga maga-umpisa na subong nga adlaw, Marso 7.
Ini nga World Cup series ang magamarka bilang una nga event para sa Pinoy gymnast halin sang nangin maluya ang performance sini sa World Artistic Gymnastics Championships sa Antwerp, Belgium sang nagligad nga Oktubre 2023.
Apisar nga sang amo nga tion naka-qualify ang 24-anyos nga Pinoy pride para sa Olympiada sa 2024, nangin pigado ang panugod sang world championships para sa iya kun sa diin nagpang-apat lamang ini sa floor exercise final.
Sang amo man nga tion nautod man ang iya nga medal streak sa global showdown matapos nga nabulsa ang at least bronze medal sa kada apat ka nagligad nga mga edisyon sang world championships.
Apang daku ang ginalauman subong nga serye bangud antes ini nga edisyon, nagpaidalom si Yulo sa masako nga training sa South Korea.
Sa World Cup Series sang Marso sang nagligad nga tuig, nagpanglakaak man ang pangalan sang Filipino gymnast matapos nga nakuha ang tatlo ka bulawan nga medalya, isa ka silver, kag tatlo ka mga bronze sa tatlo ka leg sang serye.
Sa Baku, depensahan sini ang iya titulo sa iya pet events nga vault kag parallel bars.#
(Photo is grabbed from Olympics’ website)
