Kun may mas matunog pa nga away ipaanggid sa sambuwa sang San Miguel kag Magnolia sa Game 2 sang PBA Commissioner’s Cup Finals, ini posible ang pagbaisay sa tunga nanday Hotshots forward Calvin Abueva kag asawa sang Beermen big man Mo Tautuaa nga si Aida.
Nakuhaan gid sang video ang amo nga tensyon sa tunga nanday Abueva kag asawa sini nga si Sam batok sa mga Tautuaa samtang nga paguwa na ang players kag ang ila pamilya sa Mall of Asia Arena kagab-i.
Kun si Abueva ang pahambalon, kaupod niya ang iya mga anak sang naglabay si Aida sa ila tupad. Gin-alegar sini nga gin-akusaran siya ni Aida nga naga-yuhom-yuhom sa iya. Nanginit naman si Abueva kag nagpamangkot kun sin-o gid si Aida para nga yuhom-yuhoman sini.
“Ewan ko sa kanya. Dumaan siya dito (habang) hinihintay ko ‘yung anak ko and then tinanong niya ako. Sino ka para i-smile ko ‘yan, ha, sino ‘yon, ha? Tapos nandiyan ‘yung mga anak ko tapos nagga-ganyan siya? Dumaan ako nang maayos,” suno kay Abueva.
Nag-post naman si Aida kasunod sang insidente agud nga ipaathag ang iya bahin.
Pahayag sini, wala siya pisikal nga gin-atake ni Abueva. Ang natabo suno sa iya — naglabay siya sa tupad ni Abueva agud magkadto sa restroom, apang nakit-an niya nga nag-smirk ang lalaki, naga-tango-tango, kag nagakadlaw pa.
Ini ang rason kun ngaa ginpamangkot niya ang player kun naano ini kag nagpadayon siya sa paglakat apang ginsundan siya ni Abueva kag ginkumpronta.
“I had to walk past him to go to the restroom. He smirked at me, nodded his head up and down and said, “yeaaa” laughing. I said ‘wtf is wrong with you’ and kept walking. He walked after me and literally got in my face,” post ni Aida sa X (anay Twitter).
Makit-an man sa video ang asawa ni Abueva nga si Sam nga gin-depensahan ang iya bana kag nag-lecture pa nga bilang mga asawa, indi pwede bastuson ang sin-o man nga players. Ginsiling man sini nga ginbastos gid kag wala gintahod ni Aida ang amo nga basketball veteran.
Nakit-an man nga nagpatunga pa ang MOA Arena security, PBA officials kag mangin ang active consultant sang San Miguel nga si Leo Austria agud nga indi na magsaka pa ang tensyon sang ginhangkat na ni Abueva si Tautuaa nga magtapungulay na lang bangud sa “bastos” nga ginhimo sang asawa sini.
Ginahulat ang mangin statement sang PBA kasunod sang insidente.
Indi ini ang una nga bes nga may nakaaway si Abueva nga partner sang basketball player. Sang 2019, ginmultahan man ini sang P20,000 kag ginsuspinde bangud sa ginpahayag nga bastos man nga gestures sa anay partner ni Ray Parks nga si Maika Rivera.
Sa Game 2 sang PBA finals kagab-i, nangibabaw ang Beermen batok sa Hotshots, 109-85, kag napasaka na sa 2-0 ang lead sa serye.#
