MIAGAO, ILOILO – Ginpaidalom sa total lockdown ang Camp Monteclaro sa Miagao, Iloilo kasunod sang na record nga 15 ka COVID-19 cases.
Sa interview sang Bombo Radyo kay Major Cenon Pancito III, tagpamaba sang 3rd Ifantry Division sang Philippine Army, iya ginpahayag nga may isa ka personnel nga una nga nakabatyag sang trangkaso.
Bangud sini, nagpa check-up sa hospital sa banwa sang Guimbal ang nasambit nga personnel kag natukiban nga nagpositibo sa virus.
Bilang kabahin sang protocol, ang tanan nga identified close contacts ang ginkuhaan sang swab sample para sa COVID-19 test kag 14 ang nagpositibo samtang ang iban naman nga mga personnel ang ginpaidalom sa quarantine.
Sa 15 ka COVID-19 positive, 3 ang nakitaan sang sintomas samtang ang 12 ang nagapabilin nga asymptomatic.
