Campaig materials sang Aambis-Owa Partylist, nakuha sang militar sa kuta sang mga rebelde sa Lambunao Iloilo

Nagapadayon pa subong ang ginahimo nga imbestigasyon sang Philippine Army matapos nakuha ang campaign materials sang isa ka party list kasunod sang ila pagkubkob sa kuta sang mga rebelde nga New Peoples Army (NPA) sa Sitio Agilan, Barangay Panuran Lambunao, Iloilo.

Suno kay Lieutenant Colonel Joel Benedict Batara, commanding officer sang 61st Infantry Battalion sang Philippine Army, nakuha nila sa kuta sang mga rebelde ang campaign materials sang AAMBIS-OWA partylist.

Dala sang indi magnubo sa 10 ka mga rebelde sa ila pagpalagyo ang mga high powered firearmas kag nabilin lang ang ila mga gamit sa pagluto, mga bayo kag iban pa nga personal nga gamit.

Matandaan nga una na nga ginkumpirma ni Police Regional Office (PRO) Director Police Brigadier Gen. John Bulalacao ang kaangtanan sang mga Garin sa mga rebelde.

Nabutang man sadto sa kontrobersiya si Iloilo 1st district Cong. Richard Garin matapos ginpahog sini si Police Staff Staff Sergeant Federico Macaya Jr, anay imbestigador sang Guimbal Municipal Police Station nga ipapatay niya ini sa mga NPA matapos niya ginduplaan kag ginsapote sa plaza sang Guimbal Iloilo samtang ginatayaan naman ini sang armas sang iya amay nga si Guimbal Iloilo Mayor Oscar Garin.