Magasugod na subong nga adlaw ang opisyal nga 45-day campaign period para sa local candidates para sa Mayo 12 nga eleksyon.
Buot silingon, masako na ang mga kandidato nga nagapapili para sa 82 ka posisyon para sa pagka-gobernador kag bise- gobernador, 792 ka posisyon para sa provincial board members, 149 ka pwesto para sa city mayorships kag city vice mayorships, 1,682 city councilor posts, 1,493 municipal mayorships and vice mayorships, 11, 948 municipal councilor positions, kag 254 seats sa House of Representatives.
Kaangot diri, nagpahanumdom si Commission on Elections (Comelec) Chairperson George Erwin Garcia sa tanan nga kandidato nga magsunod sa guidelines nga gin-set sang poll body para sa malinong kag matawhay nga midterm elections.
Base sa Comelec Resolution No. 11086 nga nagaplastar sang pagsulundan para sa Republic Act No. 9006 ukon ang Fair Elections Act, natalana ang campaign period para sa local positions umpisa subong nga Marso 28 tubtob sa Mayo 10, 2025.
Ang campaign period naman para sa national candidates ang nagsugod sang Pebrero 11 tubtob May 10.
Wala naman ginatugutan ang mga kandidato nga magpangampanya sa Abril 17 (Maundy Thursday), Abril 18 (Good Friday), Mayo 11 (eve of Election Day), kag Mayo 12 (Election Day.)
Suno kay Garcia, magapatuman ang Comelec sang mas strikto nga mga tikang batok sa election campaign materials nga wala nagatuman sa size limitations ukon natapik sa indi otorisado nga public spaces.
Striktuhan man sang Comelec ang kampanya batok sa vote-buying, vote-selling, kag pag-abuso sa state resources kadungan man sang paglunsar liwat sang Committee on Kontra-Bigay.
Yari ang dugang pa gid nga mga guidelines sa tion sang campaign period:
1.Ginadumilian ang paghatag sang donasyon umpisa Pebrero 11 tubtob May 12 sang isa ka kandidato, iya asawa ukon bana ukon paryente nga yara sa second civil degree of consanguinity ukon affinity, ukon ang iya campaign manager, agent, kag representative.
2.Wala ginatugutan ang pag-appoint ukon paggamit sang kapulisan, confidential agents, ukon mga tawo nga naga-perform sang pareho nga functions.
3.Umpisa Marso 28 tubtob Mayo 11, ipatuman man ang restrictions sa pag- transfer, pag- hire, kag pag- promote sang employees sa government offices.
4.Ang spending ban magaumpisa man sa sini nga period.
5.Sa gab-i antes ang adlaw sang piniliay, ipatuman man ang liquor ban nationwide.
Samtang, ginsiling ni Comelec Chair Garcia nga magapatigayon sila sang nationwide synchronized Grand Oplan Baklas subong nga aga agud kakasyn ang mga illegal campaign materials.
