Nag-abiso ang Commission on Elections (COMELEC) sa mga kandidato, party-list, kag campaign teams nga opisyal nga matapos ang campaign period subong nga adlaw, Mayo 10, 2025, takna ‘las-11:59 sang gab-i.
Sa amo nga tion, istrikto na nga dumilian ang ano man nga porma sang pagpangampanya para sa kandidato kag ‘partisan activity’ batok sa isa ka kandidato.
Kaangot diri, tanan nga mga campaign materials, lakip na ang mga posters, streamers, billboards, tarpaulins, kag ano man nga propaganda sa pribado ukon pampubliko nga lugar ang kinahanglan kakson indi maglapaw sa alas-12:00 sang tungang gab-i sang Mayo 11, 2025.
Ginmanduan man sang COMELEC ang mga kandidato, party-list groups, kag ang ila tagsa ka campaign teams nga magpatigayon sang gilayon nga pagpanglimpyo sang tanan nga mga materyales sa kampanya agud masiguro ang pagsunod sa Fair Elections Act.
Ang indi pagsunod pagakabigon nga paglapas sa pagsulundan sang eleksyon nga mahimo mangin ‘ground’ para sa administrative disqualification sa idalom sang layi.
