Matingob-pwersa ang mga personnel halin sa Department of Environment and Natural Resources (DENR) Region 6 kag City Environment and Natural Resources Office (CENRO) agud mangkakas sang campaign posters sang mga pulitiko nga ginpangtapik sa mga kahoy.
Suno kay CENRO head Engineer Noel Hechanova, umpisahan ini sa masunod nga semana.
May ipadala nga mga tinawo halin sa DENR kay may mga tinawo man halin sa CENRO.
Gin-athag ni Hechanova nga limitado lang ang ila himuon sa mga tarpaulins kag posters nga yara sa kahoy.
Ang iban nga posters nga nagalapta sa palibot sang syudad ang yara na sa hurisdiksyon sang Anti-Squatting and Illegal Structures Unit (ASIS-U).
Indi makabig nga common poster area ang mga kahoy. Lakip ini sa nakasaad sa Section 3 sang Presidential Decree (PD) 953, kun sa diin nakasaad man nga ang magalapas sa pagsulundan ang pagamultahan sang pagkapreso sa sulod sang anum ka bulan tubtub sa duha ka tuig, kag may multa nga P500 tubtub P5,000 ukon pagka-preso gid kag multa — depende sa discretion sang korte.
Ang campaign period ang magaumpisa sa Pebrero 8 para sa mga national candidates. Marso 25 naman maga-umpisa ang kampanya para sa local candidates.
Sa bahin sang Commission on Elections (Comelec), bangud wala pa naga-umpisa ang official campaign period, wala pa ini sang poder nga maka-impose sang mga pagsulundan para sa campaign posters, streamers kag tarpaulins.
Kun makaumpisa na ang campaign period, pangkakason na sang Comelec ang posters, streamers kag tarpaulins nga ginapangplastar sa guwa sang designated campaign poster areas. Sa paglibot sang Bombo News Team, kalabanan nga mga posters nga ginpangtapik sa mga kahoy ang yara sa distrito sang Mandurriao.
COMMON POSTER AREAS
Sa notice nga gin-isyu sang Office of the Election Officer – Iloilo City, yari ang common poster areas sa syudad:
* SA CITY PROPER – Plaza Libertad facing JM Basa Street
* SA AREVALO – Plaza Villa facing Iloilo Supermart, Arevalo District Health Center kag Arevalo Police Station sa Rizal Street
* SA JARO – Plaza Jaro facing Ledi Supermarket padulong sa Land Bank Jaro
* SA LAPAZ – Plaza Lapaz facing Huervana Street kag Lapaz Police Station
* SA LAPUZ – Facing Barrio Obrero Catholic Church
* SA MANDURRIAO – Plaza Mandurriao facing Mandurriao Police Station sa R. Mapa Street
* SA MOLO – Plaza Molo facing Molo Caltex Station kag Molo Mansion sa Locsin Street
