Gin-anunsyo ni Canadian Prime Minister Justin Trudeau ang iya resignation bilang lider sang Liberal Party kag pagpanaog man sa pwesto bilang prime minister kun may mapili na nga bag-o nga lider ang ruling party.
Pahayag sini, magapabilin siya anay subong bilang prime minister apang sa caretaker capacity.
11 ka tuig nga ginpangunahan ni Trudeau ang Liberal Party kag siyam ka tuig naman sa pwesto bilang prime minister antes sini ginpaguwa ang desisyon.
Ginalantaw nga gin-unahan lang sini ang desisyon sang Canada bangud may general election man nga hiwaton subong nga tuig kag ginapanan-aw na ang iya kalutusan.
Patigayunon ang piniliay antes ukon mismo sa Oktubre 20, apang sa idalom ni Trudeau, madamo ang nagsiling nga mapierde na ang Liberal Party batok sa oposisyon nga Conservative Party nga ginapangunahan ni Pierre Poilievre.
Matandaan nga nagtay-og gid ang administrasyon ni Trudeau sang nag-resign ang iya Deputy Prime Minister kag Finance Minister nga si Chrystia Freeland inoras antes ang pagdeliver kuntani sini sang annual fiscal update. Ginpaulanan sini sang kritisismo ang “political gimmicks” ni Trudeau lakip na ang two-month sales tax holiday kag 250 Canadian dollar ($175) rebates para sa kadam-an nga workers.
Ginhimo ini sa tunga sang seryoso nga pamahog ni US President-elect Donald Trump sa mas daku nga taripa sa Canadian goods nga magasulod sa Estados Unidos. Ginapakanubo man ni Trump si Trudeau kag ang Canada sa social media kun sa diin gintawag sini ang prime minister bilang “governor” sang “Great State of Canada.”
Nahibaluan nga antes sini, tatlo ka beses nga na-eleher si Trudeau bilang prime minister. Sang 2021 amo ang iya ulihi nga pagdaog apang nadulaan sang governing majority rason nga nakakuha sang lead ang Conservative Party sa Liberal Party sang masobra 20% sa national polling averages.
