Nakaabot na sa Pilipinas ang 31 ka mga Overseas Filipino workers (OFWs) nga ginrepatriate halin sa Middle East.
Sila ang ginsugata sang mga katapo sang Overseas Workers Welfare Administration (OWWA) kag sang Department of Migrant Workers (DMW), kag iban nga ahensya sang gobyerno sa Aquino International Airport.
Ang 31 OFWs ginabug-usan sang 26 ka Filipinos halin sa Israel, tatlo halin sa Jordan, isa halin sa Palestine, kag isa halin sa Qatar.
Sila ang nagsakay sa Qatar Airways Flight QR 934 nga naghugpa alas-otso kagab-i.
Ang mga ini ang una nga batch sang repatriated Filipinos humalin sang nag-ibwal ang kinagamo sa tunga sang Israel kag Iran sang Hunyo 13.
Na-delay ang ila nga flight bangud sa temporary suspension sang Qatari air traffic matapos gin-atake sang Iran ang US military base sa Doha.
Suno kay DMW Secretary Hans Cacdac, bisan pa sang mga flight delays, ang importante amo nga nagapauli nga safe ang mga Pinoy.
Una na gin-anunsyo sang DMW nga makabaton ang repatriated Filipinos sang financial assistance nga nagabalor sang P150,000, temporary shelter, transportation sa ila probinsiya, kag reintegration program.
Ginsiling naman ni Health Secretary Teodoro Herbosa, magahatag ang DOH sang medical services kag assistance sa isa ka cancer patient-repatriate, kag isa ka nagabusong nga OFW, kalakip na ang mental wellness check-up.
Base sa data, kapin sa 50 pa ka mga Filipinos ang posible nga ma-repatriate subong nga semana.
Sa 30,000 Filipinos sa Israel, naglab-ot na sa 311 ang naghingyo para sa repatriation.
