JORDAN, GUIMARAS – Ginahingyo sang Hugpong Guimarasnon kay Department of Transportation Secretary Arthur Tugade nga ibalik sa normal ang biyahe sang pump boat nga may ruta Iloilo-Guimaras vice versa.
Kadungan sang ginpatigayon nga Candle Lighting Prayer Rally sa Jordan Wharf sa Jordan, Guimaras subong nga gab-i, ginpahayag sa Bombo Radyo ni Delia Gabales Filamor sang Hugpong Guimarasnon, nga kun tani aktuhan ni Sec. Tugade ang ginahingyo sang mga pasahero.
Suno kay Filamor, naga-agunto ang mga pasahero bangud nga indi regular ang biyahe sang pump boat ilabi na kun mag-ulan rason nga nagaginutok ang mga pasahero sa pagsakay sa fast craft kag RORO vessel.
Magluwas sa pagbalik sang regular nga biyahe sang pump boat, ginahingyo man sang grupo kay Sec. Tugade nga pahanugutan nga ibalik ang atop nga tarapal sa mga pump boat agud nga indi mainitan ukon maulanan ang mga pasahero.
Ginpahayag ni Filamor nga wala sang bisan isa ka nga pulitiko nga gin-imbitar sa Candle Lighting Prayer Rally bangud nga suno kay Filamor, luyag sang ila grupo nga mangin non-partisan.
Sa pihak sini, ginpasalamatan sang natungdan si Jordan Mayor Ruben Corpuz nga nagpakigbahin sa Candle Lighting and Prayer Rally bilang tanda sang isa ka bulan nga pagsukat sang Iloilo Strait tragedy.
Ang tanan nga mga nagtambong ang nakasuksuk sang itom nga panapton kag may yara sang tela nga itom sa ila ulo bilang tanda sang pagpakig-unong kag pagkasubo sa natabo nga trahedya nga nagbawi sang 31 ka kabuhi.
May yara sang ginpatigayon nga pangadi samtang naga-uyat sang ginsindihan nga kandila ang mga tumalambong.
Ginsinggitan sang mga tumalabong ang mga tinaga nga “Bangon Guimaras! Hugpong Guimarasnon!”
