ILOILO CITY – Ginatos ang nagtipon kagab-i sa Parola Wharf agud nga magpatigayon sang Candle Lighting kag Prayer Rally may kaangtanan sa isa ka bulan nga pagsukat sang Iloilo Strait tragedy.
Sa interview sang Bombo Radyo kay Miriam Agbas sang grupo nga Bayan Muna, iya ginpahayag nga katuyu-an sang nasambit nga aktibidad amo nga ipalab-ot ang ila nga pagpakig-unong sa tanan nga mga biktima sang nasambit nga trahedya sa diin 31 ka kabuhi ang nadula.
Suno kay Agbas, may yara sang ginpatigayon nga rally bag-o pa man ang candle lighting agud nga ipalab-ot ang pagsimpatiya sang ila grupo sa tanan nga Guimarasnon.
Ginpahayag ni Agbas nga mabudlay ang kahimtangan sang mga Guimarasnon ilabi na ang masami nga nagatabok sa syudad sang Iloilo bangud nga indi regular ang biyahe sang pump boat.
Magluwas diri, ginpahayag man ni Agbas nga kun may yara man sang sakyan, kinahanglan nila nga magbayad sang mahal agud nga makasakay sa fast craft kag RORO vessel.
Kasubong sa natabo sa Jordan Wharf, nagsindi man sang kandila ang mga nagtambong sa Candle Lighting Prayer Rally sa Parola Wharf samtang ang iban naman ang may yara sang bitbit nga placard.
Ginsinggitan man sang mga nagtambong ang mga tinaga nga “Bangon Guimaras! Hugpong Guimarasnon!”.
