Naghingyo si Cardinal Pablo Virgilio David kay President Ferdinand Marcos Jr. nga magtukod sang special body agud nga imbestigaran ang linibo ka kabuhi nga nadula bangud sang drug war sang nagligad nga administrasyon.
Nakabutang ini sa iya sulat nga napetsahan nga Nobyembre 7, 2025.
Suno kay Cardinal David nga amo man ang presidente sang Catholic Bishops’ Conference of the Philippines (CBCP), kun may tukuron nga “National Truth and Reconciliation Commission”, makabulig ini nga mabalik ang dignidad sang mga pamilya sang biktima nga subong padayon nga nagapangita sang hustisya.
Pahayag ni Cardinal David, ang tukuron nga komisyon amo ang magabukad sang kamatuoran, magasiguro sang accountability, kag makabulig man sa pungsod nga magbangon nga may katampad kag moral clarity.
Ini nga special body suno sa Cardinal amo ang makahatag sa mga biktima kag mga testigo sang safe venue, ma-repaso ang mga wala naresolba na kaso, kag maka-rekomendar sang reparations, support, kag institutional reforms agud malikawan ang mga masunod pa nga pagpang-abuso.
“Truth-telling is not an act of reopening wounds– it is the only path by which wounds can finally heal,” kabahin sang sulat ni Cardinal David. “Silence breeds resentment and fear, truth restores dignity, trust, and moral coherence to our democracy.”
Suno pa sa iya, ang pagtukod sini nga komisyon amo ang magapakita sang gamhanan nga mensahe nga ginapili sang Pilipinas ang kaisog sa baylo sang kahadlok; accountability sa baylo sang impunity; kag reconciliation sa baylo sang paghipos.
“It would reaffirm a principle that lies at the heart of our democracy and our shared faith traditions: that every human life has dignity and worth,” pahayag pa sini.
Subong nga adlaw sang ginsapubliko ni Cardinal David ang panawagan nga ini sang nag-atubang siya sa media kaupod ang mga pamilya sang biktima sang war on drugs, miyembro sang simbahan, civil society groups, kag youth organizations.
Nahibaluan nga si David ang nagapungko man nga bishop sang Caloocan kag sakop sang iya Diocese ang Caloocan kag Navotas amo ang ginakabig nga “ground zero” sang drug war ni former President Rodrigo Duterte.#
