Nagkit-anay na kag naka-istoryahanay sanday Pope Francis kag Cardinal-designate Pablo Virgilio David sa Synod Hall sa Vatican City.
Base sa video sang Roman Catholic Bishop of Kalookan, gintamyaw ni Bishop Ambo si Pope Francis gamit ang lenggwahe nga Espanyol, nagpasalamat ini, kag nagsiling nga daku gid ang impact sang Santo Papa sa iya kabuhi.
Ginsugid pa sini sa Santo Papa nga wala siya nagpati sang una niya nabatian ang appointment sa iya bilang cardinal bangud nagpinsar siya nga isa lang ini ka “joke.”
Sa malip-ot nga meeting, nabatian man si Bishop David nga nagapasalig kay Pope nga yara lang siya kun kinahanglanon siya sini. Nagpangayo man ini nga i-bless siya kag nakit-an man nga gin-bless ini ni Pope Francis kag ginhakos.
Matandaan nga si Bishop David kag 20 ka iban pa halin sa lain-lain nga parte sang kalibutan ang gin-anunsyo ni Pope Francis nga mangin cardinal. Ginpatigayon ang anunsyo pagkatapos sangAngelus prayer sa Vatican sang Domingo.
Si Bishop David naman nga presidente man sang Catholic Bishops’ Conference of the Philippines (CBCP) ang yara subong sa Roma agud magtambong sa General Ordinary Assembly sang Synod of Bishops.
Ang 65-anyos nga obispo ang natalana nga mangin ika-napulo nga FIlipino cardinal sa maragtas sang Pilipinas.#
