Nag-abanse na sa quarterfinals ang Tokyo Olympics silver medalist nga si Carlo Paalam kag mas nagahilapit pa sa iya tuyo nga makabalik liwat sa Olympiada.
Ini matapos ginlutos si Artur Bazeyan sang Armenia via split decision sa Round of 16 sang men’s 57-kilogram division sa 2nd World Olympic Qualification Tournament sa Indoor Arena Huamark sa Bangkok,Thailand.
Kasunod sini, kinahanglan sang 25-anyos nga Olympian nga makabulsa sang duha pa ka daog para makapadayon sa Paris Olympics bangud limitado lamang sa tatlo ang available nga slots sa iya nga weight division.
Sang Martes, ginlutos man ni Paalam sa Round of 32 si Shukur Ovezov sang Turkmenistan. Ini man ang iya kasumpong sa una nga qualifier sang Marso sa Italya kun sa diin nag-atras ang Pinoy boxer sa tunga-tunga sang hampang bangud sa ginasuprer nga shoulder injury.
Kinahanglan nga makatapak si Paalam sa finals para nga sigurado ini nga makabulsa sang ticket padulong sa Paris Games kag maupdan ang iban pa nga Filipino boxers nga kuwalipikado na nga amo sanday Eumir Marcial, Nesthy Petecio kag Aira Villegas.
Pananglitan malutos si Paalam sa semifinals, maga-diretso siya sa box-off kun sa diin ang winner amo ang makakuha sang ikatatlo nga spot para sa Olympiada.
