Nadepensahan sang bataon nga Spanish tennis star nga si Carlos Alcaraz ang iya titulo sa Wimbledon matapos liwat nga ginlutos ang mas beterano nga si Novak Djokovic sa ila rematch sa men’s finals subong nga tuig, 6-2 6-2 7-6(4).
Apat na ka Grand Slam trophies ang nahakot ni Alcaraz nga may perperkto nga record sa major finals matapos ang iya duha ka kadalag-an sa Wimbledon, isa sa US Open sang 2022, kag isa sa French Open sang nagligad gid lamang nga bulan.
Naghimo man ini sang record bilang pinakabata nga player nga nakadaog sa Wimbledon kag French Open sa sulod lamang sang isa ka tuig.
Ini nga kadalag-an sang 21-anyos nga player amo naman ang nagbalabag sa handum ni Djokovic nga mabulsa kuntani ang iya ika-25 nga Grand Slam title agud kuntani malapawan na sini si Margaret Court sa all-time list kag matupungan man ang tennis legend nga si Roger Federer nga may walo ka men’s singles titles sa Wimbledon.
Ini nga hampang amo man ang ika-lima nga tion sa karera sang 37-anyos nga Serbian superstar nga nalutos siya sa straight sets sa finals.
Nahibaluan nga sinemana antes ang Wimbledon, nagpaidalom pa si Djokovic sa meniscus surgery sa iya tuo nga tuhod.
Sunod nga balantayan ang duha ka players sa Paris Olympics sa France subong nga Hulyo kun sa diin magapares si Alcaraz sa sa 22-time Grand Slam champion kag two-time Olympic gold medalist nga si Rafa Nadal sa doubles.
