Napilian ang medalists nga sanday Carlos Yulo kag Aira Villegas nga amo ang mangin flagbearers sang Pilipinas sa closing ceremony sang 2024 Paris Olympics.
Matabo ang seremonya ‘las tres sa kaagahon sa Lunes (Philippine time) sa Stade de France.
Si Yulo amo ang nagpanguna sa delegasyon sang pungsod subong nga tuig matapos nabulsa ang duha ka gold medals sa vault kag floor exercise sa men’s artistic gymnastics samtang debutant naman si Villegas sa Olympiada nga nakakuha sang bronze medal sa women’s 50kg division sa boxing.
Suno sa Philippine Olympic Committee (POC), magaupod man sa closing ceremony ang isa pa ka bronze medalist kag flagbearer sa opening ceremony nga si Nesthy Petecio kag iban pa nga mga tiglawas sang Pilipinas nga sanday Carlo Paalam, Hergie Bacyadan kag Eumir Marcial, John Ceniza, Elreen Ando, Vanessa Sarno, kag Lauren Hoffman.
Lakip man sa 20-strong delegation amo ang boxing kag weightlifting coaches.
Ang duha ka gold medals ni Yulo amo ang naglapaw sa impresibo man nga performance sang Pilipinas sa Tokyo 2020 sang naka-isa ini ka gold medal, duha ka silver medals, kag isa ka bronze.
Magaabot ang Olympians sa Martes sang hapon kag natalana nga mag-diretso sa Malacañan Palace kun sa diin nagahulat si President Ferdinand Marcos Jr. agud mag-abi-abi sa ila bilang mga baganihan.
