Nabulsa sang Pinoy Olympian nga si Carlos Edriel Yulo ang bronze medal sa men’s individual all-around sa 2025 Artistic Gymnastics Asian Championships sa South Korea.
Ini ang iya una nga kumpetisyon halin sang nadag-an sini ang maragtason nga duha ka gold medals sa vault kag floor exercises sa Paris Games sang 2024.
Sa iya pagbalik sa contest, naka-skor si Yulo sang 83.633 sa anum ka mga apparatus. Pangatlo siya sa scores sunod sa reigning Olympic all-around champion nga si Oka Shinnosuke (85.134) kag Hasegawa Tsuyoshi (83.967) nga pareho nga halin sa Japan.
Talalupangdon nga ang pinakamataas nga scores ni Yulo amo ang 14.433 points sa floor exercise kag 14.400 points sa vault nga amo ang duha ka mga kategorya nga iya nadag-an sa Olympiada.
Top qualifier siya sa finals sang floor exercise kag ikaduha sa vault sunod kay Mahdi Olfati sang Iran.
Balantayan ang pagbalik sang 25-anyos nga gymnast superstar sa floor exercise kag rings finals buwas, Hunyo 7, kag sa vault, parallel bars finals, kag horizontal bar finals sa Domingo, Hunyo 8.
