Matapos ang inadlaw nga pagpangulihot sang Pilipinas sa medal tally sa Paris Olympics 2024, nakaangkon na gid man sang gold medal ang nasyon kag nakanta pa ang “Lupang Hinirang” sa atubang sang linibo ka mga tawo sa France sang nagkampyon si Carlos Edriel Yulo sa finals sang floor exercise sa men’s artistic gymnastics.
Ginhimo ni Yulo ang maragtason nga kadalag-an sa Bercy Arena kun sa diin naka-skor ini sang 15.000 points kag nangin ikaduha nga Olympic champion sa maragtas sang Pilipinas kasunod sang nahimo ni Hidilyn Diaz sa weightlifting sa Tokyo Olympics 2020.
Ginlutos ni Yulo ang defending gold medalist nga si Artem Dolgopyat sang Israel nga naka-skor lamang sang 14.966 points kag nagpangaduha lamang sa ranking, samtang ang top qualifier naman nga Filipino-British gymnast nga si Jake Jarman sang Great Britain amo ang nakakuha sang bronze medal matapos nakapagkit sang 14.933 points.
Walo ang mga nag-perform sa finale sang floor exercise kag si Yulo ang ikatatlo nga nagpakita sang routine sunod sa Israel kag sa Tokyo Olympics silver medalist nga si Rayderley Zapata (14.333).
Pagkatapos kay Yulo, nagsunod ang lima ka iban pa nga gymnasts sa pag-perform sang ila routine kun sa diin ginabasehan ang difficulty kag ang katinlo kag kaayuhon sang execution apang ang 24-anyos lamang nga tumandok sang Malate, Manila amo ang isahanon nga nakalab-ot sa 15-point mark sa amo nga apparatus.
Magluwas nga una ini nga medalya sang Pilipinas sa Paris Games, ini man ang una nga podium finish sang Pilipinas sa gymnastics sa Olympics.
Ginbawi gid ni Yulo ang iya anay kapaslawan sa Tokyo Games kun sa diin wala ini nakasulod sa floor exercise final kag nagpang-apat naman sa vault.
Bangud sa iya gold medal, kumpleto na ang floor exercise collection ni Yulo nga nagalakip man sang mga titulo sa World Artistic Gymnastics Championships, Asian Artistic Gymnastics Championships, kag Southeast Asian Games.
Posible pa nga madugangan ang medalya sang Filipino gymnast bangud subong nga adlaw, Agusto 4, naka-schedule man ang medal round sa isa pa sa iya pet events nga amo ang vault kun sa diin isa man siya sa finalists.
Kun matandaan, sang nagligad nga gab-i, sulod man si Yulo sa finals sang all-around gymnastics apang nagpang-12 lamang siya sa 24 ka gymnasts bangud naglagbong ini sa una nga apparatus nga pommel horse matapos nga nadulaan sang balanse kag nahulog sa mat.#
(Screenshot from OneSports)
