Nagapadayon nga hari sang floor exercise si Carlos Yulo matapos liwat nga magdaog sang bulawan sa amo nga event sa subong nga tuig sang Asian Gymnastics Championships nga ginhiwat sa South Korea.
Ang duha ka beses nga Olympic gold medalist nga si Yulo ang nangin una sa walo ka finalists, nga may score nga 14.600, kag ginpasulabi ang tanan sa finals.
Nagpangaduha nga lugar si Milad Karimi sang Kazakhstan nga may score nga 14.400, samtang nagtapos sa ikatatlo si Moon Geonyoung sang South Korea nga may 14.033.
Ini na ang ika-apat nga sunod-sunod nga tuig nga nagdaog si Yulo sang bulawan sa floor exercise, sang una man siya nagdaog sa 2022, 2023, kag 2024 editions. Amo man ini ang ikaduha niya nga medalya sa subong nga kompetisyon matapos siya nagkuha sang bronze sa individual all-around sang Huwebes.
Sa Paris Olympics sang nagligad nga tuig, nakuha man ni Yulo ang bulawan sa floor exercise.
Nag-compete man si Yulo sa finals sang still rings, apang nagtapos siya sa ikapito nga lugar nga may score nga 13.233.
Ang “Golden Boy” sang Pilipinas sa gymnastics maga-kompetensya pa sa finals sang vault, horizontal bar, kag parallel bars subong nga Domingo.
