Pangunahan ni Carlos Edriel “Caloy” Yulo ang team halin sa Pilipinas nga magapasakop sa 53rd Artistic Gymnastics World Championships sa Jakarta, Indonesia.
Maga-umpisa ang kumpetisyon sa Domingo, Oktubre 19, kun sa diin tatlo ka adlaw ang qualification rounds kag naka-schedule naman ang finals sa Oktubre 22 tubtub 25.
Dayunon sang 25-anyos nga gymnast ang pag-intra apisar sang naangkon sini nga wrist injury, apang base sa reports, limitahan lang sini ang iya pasakupan sa floor exercise kag sa vault.
Kaupod ni Yulo ang iban pa nga Southeast Asian Games medalists kaangay kanday Juancho Besana, John Ivan Cruz kag Justine Ace De Leon, Haylee Garcia kag Paris Olympians nga sanday Aleah Finnegan kag Emma Malabuyo.
Talalupangdon nga maga-upod man sa kumpetisyon ang manghod ni Yulo nga si Elaiza.
Magasulod si Yulo sa tournament nga isa sa ginakabig bilang most decorated gymnasts nga may duha ka gold medals sa World Championship nga amo ang sa floor exercise kag sa vault; duha ka silver medals nga nakuha sini sa parallel bars kag sa vault; kag duha man ka bronze medals nga naangkon naman sini sa floor exercise kag sa parallel bars sa nagligad nga mga edisyon sang nasambit nga global event.
Sang 2023 World Championships sa Belgium, nagpang-apat lamang si Yulo sa floor exercise nga amo ang isahanon nga apparatus kun sa diin nag-qualify siya para sa finals.
