Natalana nga magdugang sa listahan sang Basketball Hall of Fame ang ten-time NBA All-Star nga si Carmelo Anthony, eight-time All-Star nga si Dwight Howard, kag ang women’s basketball icon nga si Sue Bird.
Patigayunon ang seremonya sa Naismith Memorial Basketball Hall of Fame sa Septyembre 5-6.
Nag-retiro si Anthony sa paghampang sang basketball sang 2023 duha ka dekada matapos gin-draft ini sang Denver Nuggets kag nakapagkit sang iya pangalan bilang isa sa pinakamaayo nga scorer sa maragtas sang liga. May average siya nga 22.5 points per game sa kasagsagan sang iya karera kag ginakilala man nga 10th all-time sa NBA scoring nga may 28,289 points.
Si Howard naman amo ang number 1 draft pick sang 2004 kag nagbulig sa Los Angeles Lakers nga makuha ang kampyonato sang 2020. Ginakilala siya sa bansag nga “Superman” bangud sa iya all-round offensive kag defensive game.
Lima ka beses naman nga nagdaog sang Olympic gold si Bird kag isa sa ginakabig nga greatest players sa maragtas sang women’s basketball matapos naghampang sang 21 seasons kaupod sa Seattle Storm antes ini nagretiro sa 2022.
Magluwas sa ila, ang iban pa nga Hall of Fame entrants nagalakip sang gold medal-winning 2008 Olympic men’s basketball squad sang US nga ginabansagan nga “the Redeem Team” matapos napaslawan nga makuha ang bulawan sang 2004.
Pareho nga yara sanday Anthony kag Howard sa team lakip man sanday Dwyane Wade, Kobe Bryant, Jason Kidd, LeBron James, Chris Paul, Chris Bosh, Deron Williams, Tayshaun Prince, Carlos Boozer kag Michael Redd.
