ILOILO CITY – Nagpasalig ang City Social Welfare and Development Office (CSWDO) nga padasigon ang paghatag sang ayuda sa mga biktima sang sunog nga nagluntad sa Zone 6, Barangay Boulevard, Molo, Iloilo City, Disyembre 24.
Sa inisyal nga impormasyon, P7,000 ang ihatag sa nagapanag-iya sang partially burned nga balay samtang P10,000 naman ang ihatag sa tag-iya sang totally burned nga balay.
Sa interview sang Bombo Radyo kay Teresa Gelogo, pinuno sang City Social Welfare and Development Office, iya ginpahayag nga umpisahan na sa Lunes ang pagproseso sang mga dokumento para sa nasambit nga cash assistance.
Kagab-i, una nga ginpahamtang ang mga biktima sang sunog sa barangay hall apang bangud nagaginutok sila kag indi masunod ang physical distancing, ginsaylo sila sa Baluarte Elementary School bilang ila temporaryo nga evacuation center.
Sa amo nga lugar, isa ka pamilya kada kwarto ang set-up.
May yara man sang installed community kitchen agud matatapan ang pagkaon sang apektado nga mga pamilya.
Nagabuligay man ang personnel sang City Social Welfare and Development Office kag ang mga barangay officials agud mabuligan ang mga pamilya sa ila kinahanglanon.
Santo sa updated report sang Iloilo City Fire Station, 18 ka mga balay ang nahalitan sa amo nga sunog, 18 man ka pamilya ang apektado, kag P420,000 ang estimated damage.
