ILOILO – Magaagi sa pila ka mga proseso ang cash allowance nga ginpasalig sang Iloilo Provincial Government sa mga barangay tanod.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga ginakompleto pa ang lista sang mga pangalan sang mga barangay tanod halin sa Department of the Interior and Local Government.
Ginpahayag ni Mamon, nga mahimo nga sa Enero pa mapanagtag ang cash assistance nga P1,000 para sa mga barangay tanod.
Dugang pa sang natungdan, bangud ini ang pinakauna nga kahigayunan para sa mga tanod nga makabaton sang ayuda, ginpasigurado ni Mamon nga ginasunod man ang tanan nga pagsulundan.
