Nagahilibion ang cashier sang isa ka gasoline station sa bahin sang Tabuk Suba, Jaro, Iloilo City matapos nga ginpahayag wala ginbayaran sang 100 liters sang gasolina nga ginpatughong sang ila customer.
Sa interview sang Bombo Radyo sa cashier nga si alias Anna, iya ginpahayag nga base sa ila nakita sa CCTV footage, nag-abot ang babaye sa ila gasolinahan sakay sa tricycle nga gina-drive sang lalaki nga ginapatihan bana sini.
Suno kay Alias Anna, sa sulod sang tricycle nahamtang ang mga containers nga ginbutangan sang kabug-usan nga 120 ka litros sang gasolina.
Ginseparar suno sa iya ang 20 ka litros kag amo lang ang ginbayaran sang customer.
Ulihi nalang sini nakita sa point of sale (POS) system nga may yara pa sang dugang nga 100 liters nga ginpatughong ang babayi.
Matapos nga nagbayad sang masobra P1,000 ang customer, ila na-obserbahan nga dali dali ini nga nagsakay sa tricycle kag gilayon nga naglakat.
Gintuyo pa ini nga sundan sang mga gasoline boy apang wala na naabtan.
Ginakabalak-an subong ni Alias Anna nga pabayaran sa iya ang kulang nga P6,000.
Plano man niya nga magpadulong sa Jaro Police Station agud nga magpasaka sang reklamo.
