Nagsabat si Palace Press Officer Undersecretary Atty. Claire Castro kay former presidential spokesman Harry Roque matapos gintawag siya nga “salesman” sang Marcos administration.
Suno kay Castro, indi siya salesman, kundi isa ka “messenger” sang administrasyon ni President Ferdinand ”Bongbong” Marcos Jr.
Sa statement ni Roque sang nagligad, ginsiling sini nga “good luck” na lang sa mga bag-o nga opisyal sang Presidential Communications Office (PCO) nga sanday Castro kag Jay Ruiz. Daw kaangay suno kay Roque nga nagapungko sila bilang salesman, pero suno sa iya, bisan ano pa ka maalam ang salesman kun indi man maayo ang produkto, mabudlayan man gihapon ini nga ibaligya.
Naga-guwa nga palagtik ini kay President Marcos halin kay Roque nga nagpungko anay nga spokesman sang tion ni former President Rodrigo Duterte.
”Para kang salesman eh, kinakailangang ibenta mo ang Presidente mo… pero alam ng lahat ng salesman, kahit gaano ka kagaling na salesman, kung hindi magandang produkto, mahihirapan kang ibenta. So all I can say is goodluck sa bagong PCO officials na si Jay Ruiz at Claire Castro,” suno anay kay Roque.
Nagsabat man sang palagtik si Castro. Ginsiling sini nga mabudlay gid man ibaligya ang produkto ilabi na kun kinahanglan pa limpyuhan ang mga ginahambal sang tawo. Ginpabati-batian man sini ang masami pahayag sang spokesperson anay ni Duterte nga naga-joke lang ang former president ilabi na kun kontrobersyal ang iya mga pahayag.
”Naniniwala po talaga kami na mahirap ibenta ang bulok o masamang produkto. Mahirap po talagang ibenta kapag ang ibinibenta mo ay kailangan mo pang linisin ang mga sinasabi. Mahirap ibenta ang mga tao na ang laging nababanggit ay joke lamang iyan,” suno kay Castro sa press briefing, Marso 3.
”Hindi po kami salesman dito. Kami po ay messenger. Ang salesman po kasi ay kailangan na maganda ang bokadura mo; kailangan na ibenta kahit na minsan ay hindi totoo iyong mga sinasabi mo para lang mabenta ang isang tao o isang produkto. Okay, sa amin po, messenger kami; hindi po kami nagbebenta ng Pangulo o ng gobyerno,” dugang sang undersecretary.
Nahibaluan nga umpisa sang nagligad nga semana, nangin popular si Castro sa iya mga buwelta ilabi na kun may mga isyu nga ginahaboy batok sa Marcos administration.
Ginsabat man sini mangin si former President Duterte.
Nagpahanumdom naman si Senate President Francis “Chiz” Escudero nga ang mga opisyal sang PCO indi amo ang spokesperson ni President Marcos.
“Everyone at that office serves at the pleasure of the President, but I don’t think she is the spokesperson of the President,” suno kay Escudero. “If I remember it correctly, the President said he will not have a spokesperson and that has maintained kaya title pa rin niya ay press officer… ‘Yan siguro ang dapat maisip din at maalala ng ating mga opisyal sa PCO na ang Pangulo pa rin ang nananatiling magsasalita para sa sarili niya,” dugang sini.
