Nag-file sang resolution si Senator Alan Peter Cayetano nga nagapanawagan sa gobyerno sang Pilipinas nga iduso ang interim release para kay former President Rodrigo Duterte sa International Criminal Court (ICC).
Sa iya nga resolution nga “Sense of the Senate to Urge the Philippines to Advocate before the International Criminal Court for the Interim Release of Former President Rodrigo Roa Duterte”, gin-suhestyon man ni Cayetano nga magsulod sa isa ka kasugtanan nga ipaidalom na lang si Duterte sa house arrest sa Philippine Embassy sa Netherlands samtang nagahulat sang trial.
Ginrason sang senador nga importante ini para sa ikaayong lawas sang anay presidente samtang ginasiguro man nga wala ini sang dala nga risgo sa integridad sang trial sang korte.
Sa proposal sang senador nga isaylo ang kustodiya kay Duterte sa embahada sang Pilipinas, ginsiling sini nga anuman nga makasugtan nga arrangement ang magasunod man sa kondisyon nga i-set sang Pre-Trial Chamber kaangay sang limitasyon sa hulag, pagtinir sa partikular lamang nga address, pagdumili sa pagpakig-angot sa mga biktima kag mga testigo, kag pag-comply sa summons sang international tribunal.
Sa iya apelar, ginpahayag pa sang senador nga nagaluya na ang 80-anyos nga anay punong ehekutibo bangud sa iya edad kag bangud sa kadugayon sang isolation, kag ang padayon nga pag-detain sa iya ang mahimo nga mag-epekto sa iya nga emotional kag physical health.
Pahayag pa sini, may kinamatarong ang anay presidente nga i-presume nga inosente samtang wala pa man napamatud-an nga guilty ini sa krimen sa idalom sang domestic kag international law.
“[T]o grant the former President interim release in the form of a house arrest or modified house arrest or any other appropriate arrangement, subject to conditions restricting liberty to be imposed by the ICC would be beneficial to his health, all while presenting no risk to the integrity of the ongoing trial,” kabahin sang resolution.
Dugang sini: “[T]o allow the former President – who has worked tirelessly and selflessly for the welfare of the Filipino people – to spend his twilight years far from not only home, but also his family and friends, would be the height of injustice.”
Ginrason man sang senador nga apisar nag-withdraw ang Pilipinas sa Rome Statute, mahimo sa gihapon makasulod ang Philippine Embassy sa kasugtanan agud nga makustodiya sini si Duterte pananglitan pasugtan sang korte ang petisyon sini para sa temporaryo nga kahilwayan.
Nahibaluan nga didto gihapon si Duterte sa ICC detention facility matapos nga gin-aresto ini sang Marso 11 sa kaso sini nga crimes against humanity. Natalana ang confirmation of charges sa Septyembre 23, 2025.
