Ginhangkat ni Senator Alan Peter Cayetano ang National Bureau of Investigation (NBI), Department of Justice (DOJ), kag Malacañang nga padayunon ang imbestigasyon sa 2019 Southeast Asian Games nga iya anay ginpangunahan sa kondisyon nga imbestigahan man sang minorya sa Senado ang mga iregularidad sa flood control projects.
Ini ang pahayag ni Cayetano matapos gin-anunsyo ni NBI Director Melvin Matibag ang pagtukod sang isa ka task force nga magaimbestigar sa ginapahayag nga mga iregularidad sa bidding kag paggamit sang pondo para sa 2019 SEA Games.
Sa iya Facebook livestream, nagsiling si Cayetano nga handa siya nga suportahan ang imbestigasyon sa SEA Games. Apang, dapat man suno sa iya nga imbestigahan ang ginapahayag nga anomaliya sa mga flood control project.
“Ito ang proposal natin sa NBI, sa Malacañang, at saka sa DOJ (Department of Justice)—imbestigahan niyo yung Southeast Asian Games of 2019, kung saan tayo nag-overall champion at tiningala ng buong Southeast Asia. Imbestigahan niyo ng husto, bigay niyo lahat,” pahayag sang minority leader.
“We will support totally…tapos, ako naman, sampo ng aming mga kasama na ngayon ay nasa minority, imbestigahan naman namin ang flood control. Ano? Deal?,” dugang sini.
Ginpanawagan man sang senador ang Malacañang nga gamiton ang Senate Blue Ribbon Committee sa imbestigasyon. Suno sa iya, mahapos lang i-tap ang Blue Ribbon para sa Palasyo bangud nagasunod man sanday Senator Erwin Tulfo kag Senator Ping Lacson sa mandu sang administrasyon.
Madumduman nga ginpahayag man ni Cayetano nga ang pag-anunsyo ni Matibag sang imbestigasyon sa SEA Games ang isa ka pagpang-ipit ukon “intimidation” sa impeachment court.
Ini bangud si Matibag ang isa sa mga nakatalana nga magtestigo sa impeachment trial ni Vice President Sara Duterte sa masunod nga semana.
Ginsuportahan man si Cayetano sang iya utod nga si Senator Pia Cayetano nga anay nang nagpamuno sa Senate Blue Ribbon Committee antes siya ginbuslan ni Senator Tulfo.
Sa pihak nga bahin, ginpabutyag sang Malacañang nga wala sang katuyuan nga magpamahog ukon mang-ipit ang imbestigasyon sa SEA Games kag wala ini sang kaangtanan sa impeachment trial.#
