Nagpakigkita sanday Senador Alan Peter Cayetano kag Senador Robin Padilla sa mga ginikanan sang Ateneo basketball player nga si Rene Baterbonia agud istoryahan ang plano nga paghimo sang pelikula parte sa iya kabuhi.
Ginalaragway ni Cayetano ang plano nga film bilang pagpasidungog kay Baterbonia kag sa legasiya nga iya ginbilin.
Sa Facebook Live sang senador, makit-an si Rovelyn kag ang iya bana.
“Yung pelikula na ‘to, mapapakita yung isang kabataan na nagbigay talaga ng isang malaking pangarap, ng meaning sa life, but even in his death, may injustices sa mundo na ito na kailangang tama,” suno kay Cayetano.
Sang Septyembre, ginpahayag ni Padilla nga nagapadayon ang preparasyon para sa pelikula bisan pa sa ginatawag niya nga pinansyal nga pagpamigos kag pagpamulitika sa industriya sang entertainment.
Dugang pa ni Padilla, handa na nga magpadayon sa proyekto ang iya utod nga si Director BB Gandanghari kag ang mga filmmaker halin sa Mindanao.
Sa ginaplano nga pelikula, iga-istorya ang kabuhi ni Baterbonia, isa ka 18-anyos nga basketball player halin sa Talacogon, Agusan del Sur, nga may promising career apang gulpyada nga nadula bangud sang insidente sang pagkalumos sa Dipaculao, Aurora, sang Hunyo.
Napatay si Baterbonia kag isa pa ka student-athlete sang Ateneo de Manila University men’s basketball team nga si Divine Adili, 21 anyos, kadungan sang team-building activity sang Hunyo 8.
Suno sa kapulisan, sa post-mortem examination, ang kamatayon ni Baterbonia amo ang asphyxia by drowning.
Antes siya nagsulod sa Ateneo, nangin isa si Baterbonia sa promising basketball players sa Mindanao.
Nagrepresentar siya sa Davao Region sa 2025 Palarong Pambansa, kun sa diin nangin kampeon ang team sa boys’ basketball kag ginhingalanan siya nga Most Valuable Player.
Kabahin man siya sang delegasyon sang Pilipinas nga nagdaog sang gold medal sa basketball sa 2025 ASEAN School Games sa Brunei.
Nagapreparar na kuntani si Baterbonia nga maghampang para sa Ateneo Blue Eagles sa UAAP Season 89 sang napatay siya.#
