Nagapangabay sang kaayuhan si Senate Minority Leader Alan Peter Cayetano para kay Senator Mark Villar matapos ini magbiya sa minority bloc kag naglukso sa mayorya sa upper chamber.
Suno kay Cayetano, samtang padayon sila nga nagapangamuyo para sa pungsod, ginapangabay nila ang kaayuhan para kay Villar kag sa tanan nila nga kaupdanan sa Senado.
“As we continue to pray for our country, we wish Senator Mark Villar and all our colleagues well,” suno kay Cayetano sa iya statement nga gin-post sa Facebook. “May GOD grant us all the wisdom, humility, and strength to faithfully serve HIM and the Filipino people.”
Nakumpirma ang pagbalhin ni Villar sa majority matapos siya ma-eleher bilang chairman sang Senate committee on public works bilang bulos kay Senate President Pro Tempore Vicente “Tito” Sotto III.
Na-eleher man si Villar bilang miyembro sang Commission on Appointments (CA) bilang bulos kay Senate Majority Leader Juan Miguel Zubiri.
Sa pihak sang pagbalhin ni Villar, ginpahayag ni Cayetano nga magapadayon ang minority bloc sa ila katungdanan bilang fiscalizers kag constructive oppositionists sa Senado.
Suno kay Cayetano, nahangpan nila ang mga rason kag konsiderasyon nga nagadala sa pagbag-o sang political alliances.
Ginpahayag man niya nga halin Mayo 11, nangin mas maathag kon daw ano kaimportante para sa administrasyon ang pag-angkon sang majority sa Senado nga suod nga kaalyado sini.
“We understand all too well the circumstances and considerations that lead to changes in political alliances. Since May 11, it has become increasingly clear how important it is for this administration to maintain a closely allied working majority in the Senate,” suno kay Cayetano.
Sang Mayo 11, nangin Senate President si Cayetano matapos makuha sang ila grupo ang posisyon halin kay Sotto.
Apang wala nagdugay ang iya pagpamuno bangud gin-ilisan siya pagligad sang isa ka bulan ni incumbent Senate President Sherwin Gatchalian.
Ginpabutyag ni Cayetano nga bisan ano pa ang pagbag-o sa political landscape, indi magbag-o ang katungdanan sang minority bloc nga magpanindugan sang husto, magprotektar sang mga institusyon kag magtrabaho para sa kaayuhan sang pungsod.
“But regardless of how the political landscape shifts, our duty remains unchanged,” dugang ni Cayetano. “We will continue to stand for what is right, uphold our institutions, and work for the good of our nation.”#
