Ginpakamalaot sang Catholic Bishops Conference of the Philippines (CBCP) ang Philippine Amusement Gaming Corporation (PAGCOR) bangud sa pagdamo sang online gambling.
Sa sulat ni CBCP president Cardinal Pablo Virgilio David kay PAGCOR chairman Alejandro Tengco, ginpahayag sini nga wala sang pulos ang kita sang gobyerno kung maguba ang kabuhi kag pamilya bangud sa bisyo sa online gambling.
Ang ginansya indi dapat mag-una sa moral nga katungdanan, nga amo ang naga protekta sa kaayuhan sang tanan.
Una nga ginpahayag ni Tengco nga kong lubos nga dumilian ang online gambling, dako ang madula nga kita sang gobyerno.
Madumduman nga ang CBCP ang isa sa madamo nga grupo nga nagpanawagan sa gobyerno nga lubos nga dulaon ang online gambling bangud sang negatibo nga epekto sini.
