Nagapanawagan ang Catholic Bishops’ Conference of the Philippines (CBCP) sang isa ka “National Day of Prayer and Public Repentance” sa Martes, Oktubre 7.
Ini ang sa tunga sang padayon nga mga pag-antos sang mga pumuluyo sa Pilipinas sa sunod-sunod nga kalamidad kag amo man sa isyu sang korapsyon.
Sa isa ka sulat nga ginpadala sa mga diyosesis, ginduso ni CBCP president Cardinal Pablo Virgilio David sa mga parokya, kapilya, mga eskwelahan, mga pamilya kag mga organisasyon sang simbahan nga mag-upod sa pag-obserba sini nga adlaw.
Kadungan man ini sang pista sang Our Lady of the Holy Rosary.
“In the spirit of the prophetic exhortation of Baruch (Bar 1:15–22), which is a prayer of national confession and contrition, and in the context of the calamities that continue to afflict our land, we call for a National Day of Prayer and Public Repentance,” suno kay David.
Sa kopya sang sini nga special prayer, nakabutang ang mga kalamidad nga ginasuprer sang mga Pilipino amo man ang mga eskandalo kag kurapsyon kaangay sang budget insertions, substandard nga imprastraktura nga nagapugong sa pag-uswag sang pangabuhi, political dynasties, kag patronage politics.
Ginhingyo sang CBCP President nga umpisahan ang pagpangamuyo sini nga special prayer umpisa sa Martes kag sa masunod nga mga Domingo tubtub sa Feast of Christ the King sa Nobyembre 23. Ginalaragway ini ni Cardinal David nga “sustained supplication for mercy and renewal.”#
(Photo: CBCP President)
