Nagpanawagan ang Catholic Bishops’ Conference of the Philippines (CBCP) sa mga Pilipino nga likawan ang pagpangampanya para kay Cardinal Luis Antonio Tagle nga mangin masunod nga Santo Papa.
Ini ang kasunod sang pagtaliwan ni Pope Francis sang Lunes kun sa diin isa ang pangalan ni Tagle sa nagaguwa nga posible magabulos bilang lider sang Roman Catholic Church.
Suno kay Rev. Fr. Jerome Secillano, CBCP Episcopal Commission on Public Affairs Executive Secretary, dapat nga itugyan sa cardinal electors ang desisyon kun sin-o ang magasunod sa posisyon.
Ginpahangop sini nga indi maayo nga i-promote si Cardinal Tagle bilang masunod nga Pope, bangud posible nga makahimo ini sang impresyon nga ang desisyon sa conclave ang maapektuhan pananglitan maeleher gid man ang Filipino priest bilang Pope.
“It’s not prudent for the public to promote Cardinal Tagle as the next Pope, as this could create the impression that the conclave might be swayed by external influences if Cardinal Tagle is elected as the next pontiff,” paathag ni Secillano.
Gindugang sini nga wala dapat ginatolerar ang pagpanghilabot sang sin-o man sa guwa sa kun ano man ang desisyon sang cardinal electors.
Dapat suno sa iya nga respetuhon ang desisyon nga ini kag ang independensya sang mga naga-eleher sa Pope. Dugang ni Secillano, ang mahimo lamang subong amo nga ipangamuyo si Cardinal Tagle kag ang iban nga cardinal electors.
Nahibaluan nga ang cardinals nga wala pa naka-80 anyos ang tugutan nga makaboto sa bag-o nga Santo Papa kun sa diin ginalantaw nga 135 sa senior Catholic leaders ang eligible nga makapakigbahin.
Tatlo sa cardinal electors nga ini ang magahalin sa Pilipinas nga amo sanday Cardinal Tagle nga former Archbishop of Manila; Kalookan Bishop Pablo Virgilio Cardinal David, CBCP President; kag Manila Archbishop Jose Cardinal Advincula.
Antes ang panawagan sang CBCP, madamo na sang nagalapta nga clues sa social media kun sin-o ang posible masunod nga Pope kag isa diri si Tagle.
“Wala pong kandidato sa conclave. There’s no such thing as alam ninyong election. Walang mamimigay ng ayuda, walang maglalagay ng tarpaulin, walang mangangampanya,” paathag naman ni Secillano. “Magdadasal ang mga cardinal, and it is in the spirit of prayer na kailangan itanong namin, hindi ang gusto naming iboto kun’di ang gusto ng Panginoon na mag-succeed kay Pope Francis.”
Wala pa man sang napahibalo nga eksakto nga petsa para sa conclave, apang sa kinaandan, matabo ini 15 tubtub 20 ka adlaw kasunod sang nangin kamatayon sang Pope.
