Nagpanawagan ang Catholic Bishops’ Conference of the Philippines (CBCP) sa mga tumuluo nga magpuasa indi lamang sa pagkaon kundi mangin sa paggamit sang cellphone kag social media.
Kabahin ini sang kaundan sang pastoral letter nga ginpaguwa sang CBCP samtang nagahilapit na ang pagsugod sang Lenten Season.
Lakip sa ginapanugyan nga himuon agud makapuasa sa digital media amo ang:
- paglikaw sa paggamit sang cellphone antes magtulog
- paglimita sang oras sa social media kag streaming
- Pagpahigad sang cellphone kag iban pa nga device kun nagakaon kag kun may mga pagtilipon
- pag-practice sang isa ka adlaw ukon bilog nga weekend nga pagpuasa sa digital media
- kag pagkakas sang mga distracting nga mga application sa device
Paathag sang CBCP, bisan nga naandan nga magpuasa sa pagkaon bilang akto sang penitensya kag spiritual renewal, ang pagpuasa sa digital media ukon cellphone ang isa man ka paagi agud nga malikawan ang naga-distract sa tagipusuon sa Diyos.
Ginpahayag man sang CBCP nga madamo nga mga tawo ang nagakawad-an sang focus bangud sa sobra-sobra nga paggamit sang teknolohiya nga amo man ang rason sang masami nga kakapoy, paghuyang sang relasyon, kag pagdula sang espiritwal nga ihibalo.
“Technology is a blessing when used responsibly, yet excessive media use often leads to distraction, fatigue, loss of focus, weakened relationships, and diminished spiritual awareness,” kabahin sang pastoral letter. “Constant connectivity leaves little room for silence and reflection. Many struggle to be present to God and others because screens constantly demand attention. Digital media fasting helps restore balance and reminds us that technology must serve human life-not dominate it.”
Ginapanugyan man sang mga obispo nga sa baylo sang oras sa pagtutok sa screen, dapat nga magpangamuyo, magserbisyo, magbasa, ukon makig-istorya sa iban.
Maga-umpisa ang Lenten Season sa Ash Wednesday sa Pebrero 18, apang nagapahanumdom ang CBCP sa mga diocese, parokya, pamilya, kag komunidad nga sundon ang digital media fasting bisan matapos na ang Semana Santa.
