Iloilo City – Balik na sa normal ang pag-obserba sang Mierkules de Badlis ukon Ash Wednesday sa mga Simbahan Katolika.
Ini matapos nga ginkasugtan sang simbahan sang nagligad nga mga tuig nga i-buribod lamang ang pagbutang sang abo kasunod sa paglikaw sa paglapta sang coronavirus disease.
Sa interview sang Bombo Radyo kay Reverend Father Angelo Colada, director sang Social Communication sang Jaro Metropolitan Cathedral, iya ginpahayag nga gintugyan sang Catholic Bishops’ Conference of the Philippines ang desisyon sa mga parokya tuhoy sa himuon sang mga ini bangud nahagan-hagan na ang kaso sang coronovirus disease sa pungsod.
Suno kay Colada, madamo sang kahulugan sang pagpabadlis sang tawo kaangay sa pagdumdom nga mapatay kita kag magapabilin nalang bilang yab-ok, pagbutang sang kaugalinon sa mga butang nga importante, langitnon kag wala nakadula, kag simbolo sang katinlo paagi sa pagpuasa.
Nahibaluan nga ang mga ramos ang ginagamit sang mga katoliko sa pagbadlis kun sa diin ginasunog ini kag ginapa-bendisyunan.
Samtang, nag-abiso si Colada nga mahimo magpadulong sa Jaro Metropolitan Cathedral ang tanan sa Pebrero 22 agud magpabadlis.
