ILOILO CITY – Ginapadasig na sang Iloilo City Police Office (ICPO) kag sang Iloilo City Government ang ila ginahimo nga tikang agud magpahamtang sang closed circuit television (CCTV) cameras sa dalagko nga mga karsada kag intersection sa syudad sang Iloilo.
Ini ang kasunod man sang asud-asud nga mga aksidente sa dalanon sa syudad sa diin pinakaulihi nga nabiktima amo ang gwardya nga nagasakay sa iya bisikleta kag gin-‘hit and run’ sang ginapahayag Toyota Fortuner.
Sa interview sang Bombo Radyo kay Police Lt. Col. Efren Lozada, pinuno sang Traffic Investigation and Enforcement Unit sang ICPO, iya ginpahayag nga pinaagi sa CCTV, mas mahapos nga makilala ang mga naulamid sa mga aksidente sa dalanon.
Nahibaluan nga kinahanglan pa nga magpangayo sang kopya sang mga otoridad sa mga malapit nga establisyemento sa tion nga may mga aksidente sa dalanon bangud sa kakulang sang nasambit nga equipment.
Samtang, nagpanugyan man si Lozada sa mga motorista nga mangin disiplinado kag maghalong sa pagmaneho sang mga salakyan.
Nagakadapat suno kay Lozada nga likawan ang pag-‘overtake’ sa mga dalanon kag sundon ang yellow kag white lines.
Suno kay Lozada, kalabanan sa mga ginatudlo rason sa aksidente amo ang ‘human error’ bangud sa ‘pagpatarasak’ sang pagbyahe sang mga driver.
Dugang pa sang natungdan, bisan ano pa ka hugot ang implementasyon sang mga ordinansa sang law-enforcement bodies, kun wala sang disiplina ang mga motorista, indi gihapon matapna ang asud-asud nga aksidente.
Kalabanan suno kay Lozada sa mga lugar sa diin may nagaluntad nga aksidente amo ang Sen. Benigno Aquino Jr. Avenue ukon Diversion Road, Mandurriao kag sa Buntatala Jaro, Iloilo City.
