Padayon nga gina-trace sang San Enrique Municipal Police Station ang pila ka closed circuit television ukon CCTV sa sa area kon sa diin nasapwan-patay ang isa ka lalaki sa Brgy. Paga, San Enrique, Iloilo.
Ang lalaki amo si Carlos Alcarde, 47-anyos kag residente sang Rizal Jalandoni, Calinog, Iloilo.
Sa interview sang Bombo Radyo kay Police Lieutenant Christy Val Dalde, hepe sang San Enrique Municipal Police Station, iya ginpahayag nga gina-back track na ang ginhalinan sang biktima agud matumod kon sin-o ang ulihi sini naitorya ukon nakaupod.
Suno kay Dalde, ginalantaw nila ang anggulo kon ngaa nakalab-ot sa San Enrique ang biktima bangud santo sa imbestigasyon, wala man ini sang kakilala sa lugar.
Mismo asawa ni Alcarde ang nagkumpirma nga bana niya ini matapos nabatian nga may nasapwan sa San Enrique.
Natukiban man nga may pilas ini sang pagkabuno sa iya nga tiyan kag sa likod.
Ginapaligban man sang otoridad nga mahimo ginwigit ang biktima sa lugar bangud wala sang makit-an nga senyales nga sa lugar mismo ginhimo ang krimen.
Base sa panaysayon sang iya asawa, alas-8 nagligad sang aga naghalin sa ila balay si Alcarde agud magpamiesta sa Barangay Cabagiao, Calinog kag wala na makapauli.
Nahibaloan nga si Alcarde ang may on-going nga kaso nga robbery-hold up sa banwa sang Calinog nga natabo sa isa ka hardware sang tuig 2022. Magluwas dira, wala naman sang mga nakontra ang biktima suno sa asawa.
Sa karon, padayon ang imbestigasyon sang San Enrique PNP kun paano nahimo ang krimen kag nakalab-ot sa amo nga banwa ang iya bangkay.
