ILOILO CITY – Mangin dako nga bulig sa pagsolbar sang krimen sa Syudad sang Iloilo sa tion nga maamend na ang Iloilo City Regulation Ordinance 2011-307 ukon ang ginatawag nga CCTV ordinance.
Sa interview sang Bombo Radyo kay Iloilo City Councilor Ely Estante, proponent sang nasambit nga ordinansa, iya ginpahayag nga tuig 2011 pa ini napasar.
Apang matapos ang walo ka tuig, wala mailisan ang pila ka bahin sang kaundan sang ordinansa.
Suno kay Estante, importante ang pagpahamtang sang closed circuit television camera sa tanan nga mga establisyemento bangud sa tion nga may krimen, makabulig ini sang dako sa mga imbestigador.
Ginpahayag ni Estante nga nagareklamo ang mga katapo sang Philippine National Police bangud may mga tag-iya sang establisyemento nga nagapakatig-a nga maghatag sang kopya sang ila closed circuit television camera sa tion nga may krimen.
Magluwas sini, may mga nagapahamtang man sang closed circuit television camera sa ila mga establisyemento, apang wala man naga function.
Sa tion nga ma-amend na ang ordinansa, magapangatubang sang penalidad ang mga magalapas diri.
Nahibaluan nga ang nasambit nga ordinansa ang nagasakop sang mga bangko kag ang ila satellite offices, branches kag automated teller machines (ATMs), money changers, pawnshops, kag iban nga credit, lending kag financial institutions; hotels, malls, supermarkets; fuel, petrol ukon gas stations; transport terminals; convenience stores nga naga operate sang 24 oras ukon naga-operate kun gab-i; private schools; nga stores nga nagabaligya ilimnon lakip na apang indi limitado sa disco houses ukon clubs; mga lugar kun sa diin nahamtang ang critical assets ukon propedad sang City Government.
