Amyendaran ang Closed Circuit Camera Television (CCTV) ordinance sa syudad sang Iloilo agud mabutang ang pila ka standard specification kag mas mabuligan ang mga otoridad sa pagsolbar sang mga krimen.
Sa interview sang Bombo Radyo kay Iloilo City Councilor Ely Estante, author sang ordinansa, iya ginpahayag nga ginatinguhaan nga ma-draft na ang amendments para sa first reading sa Iloilo City Council subong nga Disyembre.
Lakip sa ibutang nga amendments amo ang pagmandu sa tanan nga establisemento kun sa diin natabo ang krimen nga maghatag sang kopya sa otoridad ukon sa investigating officers.
Ini ang mas mahapos kag makabulig sa seguridad ipaanggid sa nauna na nga ordinansa nga kinahanglan pa ang court order.
Sa idalom man sang Regulation Ordinance 2011-307, tanan nga business kag commercial complexes, establishments kag iban pa nga high-risk places ang kinahanglan nga mag-install sang CCTVs.
Apang sa amo man nga ordinansa, wala nabutang ang specification sa CCTV resolution ilabi na bangud 2011 pa ini nabalay kag madamo na ang pagbag-o sa teknolohiya.
Ipa-improve man ang kalidad sang surveillance cameras sa mga “high risk areas” kaangay sang motels, drive-in hotels, pension kag lodging houses, kag amo man sa seaports.
“Siguraduhon naton nga indi useless ang CCTV. Dapat makita ta gid sang klaro ang mga hulag sang mga tawo nga nagahimo ukon may plano nga maghimo sang krimen,” pahayag ni Estante.
